हुलाकी पाटी 
खगेन्द्र बस्नेत
धनकुटा । साँगुरीगढी गाउँपालिका वडा नं १ मा सामाजिक सुरक्षा भत्ता वितरणसँगै निःशुल्क स्वास्थ्य परीक्षण कार्यक्रम सञ्चालन गरिएको छ । वडा कार्यालयले सामाजिक सुरक्षा भत्ता लिन आएका ज्येष्ठ नागरिक, एकल महिला तथा अन्य लाभग्राहीको स्वास्थ्य अवस्थालाई मध्यनजर गर्दै भत्ता वितरणसँगै स्वास्थ्य परीक्षण सेवा उपलब्ध गराएको हो ।
वडा नं. १ का वडाध्यक्ष गोविन्द लिम्बुका अनुसार लामो समयदेखि सामाजिक सुरक्षा भत्ता वडा कार्यालयमार्फत वितरण हुँदै आएको छ। यस वर्ष सेवाग्राहीलाई थप सहज र स्वास्थ्यप्रति सचेत बनाउने उद्देश्यले भत्ता वितरणसँगै निःशुल्क स्वास्थ्य परीक्षण कार्यक्रम पनि सञ्चालन गरिएको हो । उनले सामाजिक सुरक्षा भत्ता प्राप्त गर्न वडा कार्यालयमा आउने सेवाग्राहीलाई एकै स्थानबाट स्वास्थ्य सेवा उपलब्ध गराउँदा उनीहरूको समय र खर्च दुवै बचत भएको बताए । आगामी दिनमा पनि यस्ता सेवामुखी कार्यक्रमलाई निरन्तरता दिइने उनको भनाइ छ । कार्यक्रममा स्वास्थ्यकर्मीले रक्तचाप, मधुमेहलगायत आधारभूत स्वास्थ्य परीक्षण गरी आवश्यक परामर्शसमेत प्रदान गरेका थिए। स्थानीयले सामाजिक सुरक्षा भत्तासँगै स्वास्थ्य परीक्षण सेवा सञ्चालन गरिएकोप्रति खुसी व्यक्त गरेका छन्।
प्रतिक्रिया दिनुहोस्