हुलाकी पाटी 
काठमाडौँ । सरकारी वकिलको कार्यालय चितवनले सहारा सहकारी ठगीमा रास्वपा सभापति एवं पूर्वगृहमन्त्री रवि लामिछानेलगायतलाई प्रतिवादी बनाएर चितवन जिल्ला अदालतमा मुद्दा दायर गरेको छ ।
सरकारी वकिलको कार्यालयले सोमबार नै अभियोजन पेश गरे पनि मंगलबार मात्र मुद्दा दर्ता गरेको छ । अभियोजन पत्रमा लामिछाने समेतको हस्ताक्षरमा संयुक्त सञ्चालन हुनेगरी खाता खोलेको दिनदेखि नै कानूनी दायित्व शुरू भएको देखिने दाबी गरेको हो ।
सहारा चितवन बहुउद्देश्यीय सहकारी संस्था ठगी प्रकरणमा उनी लगायत १५ जनाविरुद्ध आज मुद्दा दर्ता भएको हो। प्रहरीको अनुसन्धान प्रतिवेदनमा सहाराको ३८ करोड ९ लाख ७९ हजार रुपैयाँ हिनामिना भएको उल्लेख छ । लामिछानेसँगै रामबहादुर खनाल, रबिना रिमाल, नवीन अछामी, विशाल तामाङ,कविता तामाङ, दीपक लामा, असरफ अलि सिद्दिकी, भगवती बमजन, लक्ष्मीप्रसाद पौडेल, विज्ञान राई, नेत्रपाणि बास्तोला‚ शिवबहादुर गुरुङ र प्रगति श्रेष्ठविरुद्ध मुद्दा दर्ता गरिएको हो।
रविलाई सहकारी ठगी सम्बन्धमा मात्रै मुद्दा दर्ता गरिएको छ भने अरूलाई संगठित अपराध कसुरमा समेत मुद्दा दर्ता गरिएको सरकारी वकिल कार्यालयले जनाएको छ।
यो मुद्दा दर्तासँगै रविविरुद्ध सहकारी प्रकरणमा कूल ४ वटा जिल्लामा मुद्दा दर्ता भएको छ। यसअघि कास्की, काठमाडौँ र रूपन्देही जिल्लामा दर्ता भएको मुद्दा चलिरहेको छ।
कास्की जिल्ला अदालतले ६५ लाख रुपैयाँ धरौटीमा लामिछानेलाई रिहा गरेको थियो। यस्तै, काठमाडौँ जिल्ला अदालतले ६० लाख रुपैयाँमा र रूपन्देही जिल्ला अदालतले एक करोड रुपैयाँ धरौटीमा उनलाई रिहा गरेको थियो।
प्रतिक्रिया दिनुहोस्