सप्तरीको नमोवुद्धलाई सहिद भीमनारायण गोल्डकपको उपाधी

धनकुटा । सप्तरीको नमोवुद्ध युथ क्लवले १७ औं संस्करणको सहिद भीमनारायण गोल्डकपको उपाधी जितेको छ । धनकुटा सदरमुकामस्थित तल्लो टुँडिखेलमा शनिवार सम्पन्न फाइनल खेलमा उदयपुरको गाईघाट फुटवल क्लवलाई पेनाल्टी सुटआउटमा ५–३ गोलअन्तरले पराजित गर्दै नमोवुद्धले उपाधी जितेको हो ।

निर्धारित समय २÷२ गोलको वरावरीमा सकिएपछि खेल पेनाल्टी सुटआउटमा धकेलिएको थियो । पेनाल्टी सुटआउटमा नमोवुद्धको तर्फबाट विवेक राई, हेमन्त भूजेल, प्रवेश दनुवार, सनम धिमाल र आयुष मगरले गोल गरेका थिए । गाईघाटको तर्फबाट निश्चल मोक्तान, आकाश राई, प्रविन राईले गोल गरे । धिरेन क्षेत्रीको प्रहार नमोवुद्धका गोलकिपर रविन वस्नेतले रोकेका थिए । उपाधी सँगै नमोवुद्धले नगद ४ लाख ९९ हजार ९ सय ९९ रुपैया सहित ट्रफी हात पारेको छ । भने उपविजेता गाइईघाटले नगद २ लाख ५० हजार रुपैया र ट्रफीमा चित्त वुझाएको छ ।

खेलको ४० औं मिनेटमा राज भुषालले गोल गर्दै नमोवुद्धलाई सुरुवाती अग्रता दिलाएका थिए । एक मिनेट वित्न नपाउँदै ४१ औं मिनेटमा गाईघाटका आकाश राईले गोल गर्दै खेल वरावरीमा ल्याए । तर ४४ औं मिनेटमा क्षितिज भण्डारीले गोल गर्दै नमोवुद्धलाई २–१ को अग्रता दिलाए । खेलको ८३ औं मिनेटमा उदयपुरका अशिम राईले गोल गर्दै खेललाई बरावरीमा ल्याए । त्यसपछि निर्धारित समय भित्र दुवै टिमको गोल हुन सकेन । खेल २/२ गोलको वरावरीमा सम्पन्न भयो ।

फाइनल खेलको म्यान अफ द म्याच नमोवुद्धका गोलकिपर रविन वस्नेत घोषित नगद ५ हजार ५ रुपैया प्राप्त गरे । विधागत तर्फको पुरस्कार नमोवुद्धका खेलाडीको वर्चश्व रह्यो । प्रतियोगिताको सर्वोत्कृष्ट खेलाडी नमोवुद्धका राज भुषाल घोषित हुँदै नगद १७ हजार ५ सय ५५ रुपैया प्राप्त गरे । त्यस्तै नमोवुद्धकै आयुष मगर उत्कृष्ट डिफेन्डर, उकृष्ट मिडफिल्डर विवेक राई, उत्कृष्ट प्रशिक्षक सुरेश लामा घोषित हुँदा गाईघाटका विदेशी खेलाडी फोफाना उत्कृष्ट स्टाइकर घोषित भए । विधागत तर्फका उत्कृष्ट खेलाडीहरुले जनही ७ हजार ५ सय ५५ रुपैया र ट्रफी प्राप्त गरेका थिए । विजेता तथा उपविजेता टिमलाई प्रमुख अतिथि धनकुटा नगरपालिका नगर प्रमुख चिन्तन तामाङ, पाख्रिवास नगरपालिका नगरप्रमुख ज्ञानबहादुर गुरुङ, सहिदपुत्रद्वय मनोहरनारायण श्रेष्ठ, मनोजनारायण श्रेष्ठ लगायतले पुरस्कार वितरण गरेका थिए ।

२०५५ सालमा सुरु भएको यो प्रतियोगिताको यो १७ औ संस्करण हो । प्रतियोगितामा ८ टिमको सहभागिता रहेको थियो । शहीद भीमनारायण श्रेष्ठलाई विराटनगरमा राजा विरेन्द्रलाई बम हानेको आरोपमा पक्राउ गरि २०३५ सालमा तत्कालिन सरकारले गोली हानी हत्या गरेको थियो । उनलाई तत्कालीन् सरकारले २०७३ सालमा राष्ट्रिय सहिद घोषणा गरेको थियो । उनकैको सम्झनामा हरेक वर्ष प्रतियोगिता संचालन हुँदै आइरहेको छ ।

 

प्रतिक्रिया दिनुहोस्